ഒരാണ്ടത്തെ കാര്ഷികവേലയുടെ സഫലമായ വിളവെടുപ്പിന്റെ ഫലവും സന്തോഷവും ഗ്രാമദേവതക്ക് സമര്പ്പിക്കുന്ന നാട്ടുതാലപ്പൊലികളെ എമ്പാടും 'പൂര'മാക്കി മാറ്റുന്ന ഒരു 'ഫ്ളക്സ്' സംസ്കാരം അതിവേഗം പടരുന്നത് കാണുന്നു. 'താലപ്പൊലി'ക്കും 'ഉല്സവത്തിനും' പൂരത്തിനും പ്രകടമായ അര്ഥഭേദങ്ങളുണ്ട്. ആ വാക്കുകള് അര്ഥമറിഞ്ഞു വേണം പ്രയോഗിക്കാന്. യഥാര്ഥ പൂരങ്ങള് എണ്ണത്തില് കുറവാണ്. ആറാട്ടുപുഴ, പെരുവനം, തിരുമാന്ധാംകുന്ന്, ചിനക്കത്തൂര് എന്നിങ്ങനെയാണവ. ഊത്രാളിയിലും നെന്മാറയിലുമൊക്കെ വേലയാണ്. ഗുരുവായൂരും വൈക്കത്തും ശബരിമലയിലും ഏറ്റുമാനൂരും ചെര്പ്പുളശ്ശേരിയിലും തിരുവേഗപ്പുറയിലുമൊക്കെ ചിട്ട പ്രധാനമായ ഉല്സവമാണ്.
